Аз же, о любимый и сладчайши мой брате, отнели же позавидев враг нашему вкупе сопребыванию, и разлучитися нам сотвори друг от друга преж смертнаго и конечнаго разлучения, и не пребысть сердце мое на месте, но аки море волнуемо бурею печали.
Но тогда убо твоим пришествием мало утешение приобретах, ныне же, увы мне, всеконечно тебе от мене разлучиша, и выше естества убо воспаляясь пламень печали поедаеть мене, и острейши ныне в моем сердци вонзеся копие нашедшего на тя искушениа и на всех нас.
Олядиневшу убо винограду Русския земля, и вместо благих дел плода приносяще терние и волчец скверных дел, и отнят бысть от нея оплот и стена дарований Христовых, иже рече священным своим учеником: «Веруа в Мя, дела, еже аз творю, и той сотворит и болша сих» (Ин.14,12), и никто же не бысть достоин тех дарований.
И сего ради мнози уклонишася к диявольским чарованием, мняще то быти истинно, и погрязнуша во глубине отступления. И снаходи бо скверный сатана, и обрете многих землю сердечную взорану и умягчену сластьми житейскыми, тщеславием и сребролюбием, и неправдою, и посея скверныя своя плевы скверноубийственых онех ехидн исчадием дерзнувших на милостиваго и сладкаго ми владыку. О земле и солнце, како терпиши! И ни единоя сквернии оставиша хулы и поругания еяже не излияша мерзкими своими языки на единочадаго Сына Божия и Пречистую Его Матерь.
Подвигнися убо и ты, брате, пострадати за пострадавшего по нас, да твоими подвиги очистит Господь церковную и доброцветущую ниву от пагубных и жидовскых плевел, и порежет серпом гнева своего, и свяжет тьмою погибели, и ввержет в геенскую пещь, и мечем уст своих отсечет главу сатанина и дивия вепря, пришедшаго от луга и озобавшаго виноград его, и осквернившаго святительский великий престол, и исторгнет тя от зубов его. На искус бо пусти на нас толикую беду всевидящий божий промысл, и нас ради терпит сладчайший Господь толикую хулу, якоже и преж претерпе поругание и смерть, яко до отлучятся любящеи его от миролюбных, да не и тии с ними погрязнут в сланых водах горкаго сего моря житиа суетнаго, но да пристанут во пристанище Царствия Небеснаго. Потщися убо и ты, о любезне, отрясти сон житиа суетнаго и его пристрастна, и возвысися крилом любве Господа нашего Иисуса Христа, единочадаго Сына Божиа, изшедшего от недр отчих и воплотившася нас ради, и ради единоа любимых любве покорися страстем, иже Отцу сопрестолный Сын, иже о тем ангел восхваляем, поруганиа, и досады, и смерть нас ради претерпе. Воспалися убо и ты к нему любовию неизреченнаго его смотрениа, услажаем бесстрастныя ради страсти. И отряси малодушие от себе, и уготовися на всякиа беды и смерть его ради, аще будет время, и не помышляй тяжесть и злолютство мук, но все упование на него возложи с зелною и горящею любовию и истинным покаянием.
Ныне же ти время благопотребно, восиявши весне постной. Вем бо, вем, яко послет Господь в сердце благодати росу оставившу житие се суетное, и производившему всем сердцем его ради умрети. Душа бо, упившиаея любовию Христовою, аки елень на источники, не ощущает скорбей, аще и вся вселенная подвигнется на ню; аще и небо с землею сразиться, не могут его поколебати. Аще ли же уловлена будет от диавола малодушия сетьми и увязнет ногты во мрежах слабости жития сего суетного, не возможет противустати и малому искушению, нашедшему на ню, но аки лист трепещет; малодушие бо и божию помощь творит от нас отьити, и дияволу, увы мне, возмогати на нас устраяет. Подвигнися не уловлен быти ими, и инех с собою поущай стати и пострадати за благочестие и до смерти. Аще убо не ныне умрем, умрем всяко безделною и неполезною смертию, и та бо поистинне горка ничим же легчяйши тоа, якоже нас божественая писания учят, и братиа наша исходящей предпоказуют злолютство тоя. Иже бо Христа ради смерть, тело оскорбляет, но душю надежею веселит; сиа же бо тело болезнию мучит, душю же безнадежием совести ради греховъныя. Потщися убо сотворити, брате, благу весть слышети о тебе.
Помяни убо, еже от юности твоей сопребывание со мною, и еже о бозе духовную любовь помяни, яко от млады връсты тя восприах. Помяни и смертную лютую чашу, ея же горькаго пиянства всяк видев, солнце сиа не может гонзнути. Помяни, како с Христом царствуют страдавшеи его ради и зрят пречистое лице его. Сам бо рече: «Идеже есмь Аз, ту и слуга мой будет, и аще кто мне служит, почтет его Отец мой» (Ин. 12,26) и «иже исповест мя пред человеки, исповем его и Аз пред Отцем моим небесным» (Мф.10:32). Помысли, каков свет радости срящет тогда душу, егда речет Христос: «Сей, Отче, исповесть мене пред человеки во времена лютейшая паче всех времен, исповежь его и ты пред аггелы своими». К отвершему же ся речеть: «Сей отвержеся меня пред человеки, да отвержен будет от лица твоего пред аггелы твоими». Но аще покажеши произволение благо, многу ослабу грехом подаст ти Бог.
Понеже бо постигохом во времена лютейшая паче всех времен, еже не бысть, Христе милостивый, отнели же солнце благочестия нача сияти в Российской земли. Возвеяша бо пагубнии жидовстии тлетворнии ветри, хотяще разбити душевный нашь корабль и потопити богатество благочестиа слаными водами скорбей, иже излиаша на тебе, их же надеюся волнением и аз обуреваем быти и вси верующеи истинно в господа Иисуса Христа, дóндеже уставит Господь жидовскую бурю и наставит на пристанище благочестия, и явит истинного кормчия в корабли церьковнем молитвами Святыя Богородицы и всех святых. Аминь.
«Послание брату Вассиану» издается по списку БИЛ, Рогожск. № 530 (Р); разночтения и исправления по спискам ГПБ, F. 1.229 «(Т)» и ГПБ, Дух. ак., А. II. 39
Помощь сайту: Отправить 100 рублей
Одежда от "Провидѣнія"
Мастерская "Провидѣніе"
Источник — azbyka.ru
