Помяни, Господи, во Царствии Своем весь почивший Род наш, всех иже от праотца нашего Адама усопших родоначальников, прародителей, праотцев, праматерей, отцев, братий и сестер наших единокровных (имена) и всех от века и до днесь почивших сродников наших по плоти, ихже имена веси, Господи. Судия Праведный и Милосердный, наказующий чад за нераскаянныя греси родителей до третьяго и четвертого колена, помилуй и прости всех сродников наших усопших и весь Род наш Руский за вся великия и тяжкия согрешения от века содеянныя. За богоотступничество и цареборчество, за вся вольныя и невольныя согрешения, за преступления и кровь братскую, невинно пролитую и вопиющую к Богу, за попрание соборныя клятвы, за измену и предание на смерть Помазанника Божия Святаго Царя Мученика Николая и его Семьи, за отречение от Бога и Православныя Веры, за гонения на Святую Церковь и уничижения верных, за разрушения и осквернения храмов Божиих, за поругание святынь и Православнаго Отечества нашего, за идолобесие, идолопоклонство, за почитание богомерзких праздников, обрядов, истуканов, кумиров и символов антихристовой власти, за приятие лжеучения, еже мнит будто человеци не по образу и подобию Божиему сотворены, но от гадов, скотови прочия твари безсловесныя точию произошли, за отрицание промысла и бытия Божия, за вольное или невольное служение антихристовой власти, за участие в делах ея воинских или мiрских, за гордыню и нечестие, за братоубийства, самоубийства, скверноубийства, детоубийства во утробе матерней, за измены, мятежи, чародейства, зломыслие, злонравие, колдовство, гадания, ворожбу, блуд, пьянство, разврат, сквернословие и богохульство. За вся смертныя тяжкия греси, кощунства, скверны и прочия беззакония от века содеянныя, их же несть числа. Прости, Человеколюбивый Господи, вся люди Твоя от Рода Рускаго. Токмо на милость Твою уповаем. Вемы, яко Ты греси и нечестия отцев наказуеши в детях, внуцех и правнуцех даже до третьяго и четвертаго колена, но и милуеши отцев за молитвы и добродетели чад их. Не остави же и не попусти до конца погибнути и во гресех сгинути, но помилуй и прости родителей, сродников и единокровников наших. Не наказуй вечным наказанием, но избави я от погибели, ниже ведали многия вся, елика творят. Разреши узы греха и всякия неправды, растерзай клятву страшную и вся заклятия бесовския за беззакония попущенныя, убо и днесь связаны и обременены оными не токмо колена наша, но и весь Род наш. Егда пред Богом на Судище Страшнем вся языцы предстанут, где обрящется Род Руский? Патриарси, епископы, священници, монаси, цари, царицы, князи, княгини, мiряне, вожди и воины, живот свой во бранех положившия, или в море погибшия, или крамолою убиенныя? Не токмо Богу угодившия, но и прочия сродници наша во гресех без покаяния скончавшиеся? Не токмо молитвенници, святыя и благоверныя, не токмо верныя, но и неверныя сродници и единокровници наша в нечестие впавшия, иже купно с нами елицы станут пред Тобою? Дондеже Суд сей Страшный не настал, прости и помилуй усопших родоначальников, прародителей, праотцев, праматерей, отцев, братий и сестер наших единокровных молитв ради всех святых от Рода Рускаго. Смилуйся, Господи, прости и помяни вкупе во Царствии Своем всех от века скончавшихся сродников и единокровников наших и во святом Крещении, и ниже познавших Свет Истины. Возьми вся праведныя и неправедныя, именитыя и безымянныя души руския в руци Своя и ослаби, остави вся согрешения я вольная и невольная и даруй им Царствие Свое Небесное и со святыми упокой в вечной славе Твоей. Аминь

Помощь сайту: Отправить 100 рублей

Одежда от "Провидѣнія"

Мастерская "Провидѣніе"

Источник — http://rpczmoskva.org.ru/